Aberto o prazo de solicitudes no Mercado

Unha das teimas do noso grupo municipal dende o comezo desta corporación foi a potenciación do Mercado municipal. Unha vez aprobado o novo regulamento, ábrese o prazo de solicitude dos postos vacantes, que permitirán diversificar a actividade e impulsar o comercio local.
O prazo está aberto dende o 2 ao 15 de Setembro. A información completa da convocatoria, así como o novo regulamento e o plano do mercado, poden consultarse na páxina web do Concello: http://www.concellodemugardos.org/es/noticias/2013/09/02/abierto-plazo-solicitud-puestos-vacantes-mercado-municipal-abastos

Dinamizar a economía local

En agosto de 2011, EU presentou unha proposta de Regulamento para o Mercado Municipal: o regulamento aprobado no Pleno do 20 de maio por "unanimidade" recolle o sustancial da nosa proposta. Este  Regulamento debe supor un impulso para diversificar a oferta do mercado e a apertura de todos os postos.

17 de Outubro. Manifestación

Dende Esquerda Unida animámosvos a participar na manifestación do día 17 contra a política de suicidio económico do PP:

Charla de Costa Noroeste, venres á oito da tarde

O venres 11 de Maio haberá unha charla de Costa Noroeste ás 8 da tarde no salón de Plenos do Concello, para dar a coñecer as axudas do Programa Leader Galicia 2007-13. Poden ser beneficiarios todas aquelas persoas cun proxecto de inicio ou desenvolvemento de actividade económica. Non é indispensable a inscripción previa para asistir, aínda que, por motivos de organización, se fale dela na web do Concello.

O BNG,PP e PSOE din NON

O Pleno do Concello de Mugardos sumouse á ruptura da unidade que se visualizou en tódolos concellos da comarca e aprobou a declaración alternativa proposta polo BNG, sumándose así ó Concello de San Sadurniño, gobernado con maioría absoluta polo BNG.

Os grupos municipais de PP (representado por Mónica en exclusiva) e PSOE se sumaron á estratexía do BNG de ruptura da unidade do mínimo común denominador entre as forzas políticas e os Comités de Empresa (a excepción da CIG) que supoñía a Declaración Institucional pactada e que foi aprobada no resto de Concellos.

EU mantivo no Pleno que a Declaración Institucional, aínda sendo insuficiente, cumplía o obxectivo de enviar unha mensaxe contundente dos concellos das tres comarcas ó goberno central para que cumpra os seus compromisos co naval público e con Ferrol.

Costa Noroeste: 600.000€ para proxectos productivos

Debemos aproveitar a oportunidade para implantar proxectos productivos que xeneren emprego.

Os proxectos subvencionados (ata o 50%) van desde ampliación de empresa de carpintería e fabricación de mobiliario de cociña ata creación e explotación de empresa de turismo de aventura pasando por ampliación de empresa de panadería artesana.

En Mugardos temos empresas que poden necesitar novas ampliacións, diversificacións ou persoas que poidan crear a súa propia empresa para saír do pozo no que estamos.

Costa Noroeste pode ser unha oportunidade para intentar por en marcha novos proxectos. Para máis información entra na páxina: www.costanoroeste.org

O noso grupo municipal é o representante do Concello na Xunta Directiva de Costa Noroeste: se precisas  algo, non dubides en contactar con nós.

Costa Noroeste, o goberno desaproveita a oportunidade

O goberno municipal desaproveita a oportunidade de presentar proxectos non productivos (prestar servicios públicos, dotacións e melloras na calidade de vida do rural). Tras perto de 4 anos de vida de Costa Noroeste, só presentamos a actuación no Río Baa en agosto de 2010, iso si, tras moitas presións.

Nesta corporación, a insistencia do noso grupo levou a que se aprobase nunha comisión elaborar un proxecto para rexenerar a zona do Lavadeiro do Arrueiro en Franza. Nunca apareceu o proxecto. Máis adiante seguimos insistindo e apareceu unha memoria para, entre outras cuestión, adecuar os equipos informáticos do Centro de Formación. Resultado: quedou no olvido.

Outros concellos fixeron un maior aproveitamento, como Ares: parque en Redes, rehabilitación local para local de ensaio ou usos sociais.

Agora, para o ano 2012 xa non hai fondos para proxectos non productivos. Quizais o goberno decida presentalos.

226 paradas/os só con certificado de escolaridade

A realidade é tozuda e os datos cantan. Temos un grave problema coa cualificación dos/as paradas/os para poder acceder ó mercado laboral.

Unha vez máis o noso grupo municipal insiste, como no Pleno Ordinario de Marzo, no que plantexamos a necesidade de que o Concello facilite formación para superar as probas de Competencias Clave. A superación das mesmas é imprescindible para acceder ás accións formativas dos novos certificados de profesionalidade nivel 1 e 2 de cualificación dentro da formación profesional para o emprego.

Na vindeira Comisión de formación novamente plantexaremos a necesidade de que se habiliten as medidas necesarias para formar ós maiores de 18 anos que carecen da ESO, para poderen presentarse ás probas que terán lugar o 13 de setembro.

Rectificar é de sabios

O Regulamento da Festa do Polbo aprobado por BNG/PP/PSOE tivo 15 días de vixencia. A Comisión Organizadora da Festa composta pola tríada “modificouno” o 15 de marzo, para dar acobillo a tódalas organizacións que solicitaron participar: Asociación Cultural Cofradía de Jesús de Nazareno, Rondalla Mugardesa, Casino de Mugardos, Casino de San Xoán, Casino Progreso de Franza (1ª vez), Club do Mar e Galicia de Mugardos.

O Regulamento derogado dicía: "no caso de que as solicitudes de participación fosen superiores a 6 sociedades a adxudicación dos postos o fara a comisión organizadora tendo en conta os seguintes criterios”: local social en propiedade, nº de socios, arraigo social, actividades que realizan durante todo o ano, etc.

¿Por qué 6 sociedades? Dicían que “polo espacio dispoñible e polo sistema de rotacións empregado”.

O 14 de febreiro de 2011, a Comisión de Cultura recoñecía a necesidade de elaborar un Regulamento de admisión de entidades tras a decisión unilateral do Alcalde, en contra da maioría da Comisión, de incorporar á “Asociación Cultural Cofradía de Jesús de Nazareno”. O 27 de xullo de 2011, EU presentou unha proposta para a mellora da Festa na que se incluía aprobar un Regulamento. O 7 de febreiro de 2012, e tras múltiples preguntas sen contestación, presentábamos unha proposta de Regulamento.

Á espera de ver as novas modificacións que acordaron na reunión da Comisión organizadora, este ano a Festa contará con 7 entidades “culturais e deportivas”. ¿Contaremos no 2013 con 8 entidades? Poderán participar tódalas entidades que o soliciten? O tempo o dirá.

Xoguetes de Nadal:Grazas, Mr. Scrooge!

Dos 800 € destinados para Axudas de Xoguetes de Nadal, os/as beneficiarios/as só puideron xustificar o 60%, así que temos un aforro de 300€.

As notificacións da concesión ou denegación da axuda producíronse a partires do 24 de xaneiro, pero iso si, tiñas que ter a factura de antes do 6 de Xaneiro.

Destacar tamén que só o 33% dos cartos foron xustifacados con facturas do comercio local.

Conclusión: Os grupos municipais do BNG e PP, que aprobaron as bases do ano 2011, deberían reflexionar para aprobar no ano 2012 unhas bases que realmente respondan ás necesidades das/os nenas/os cuxa familia pasa por dificultades e favorecedoras da economía local.

Hai que actuar polo emprego

O peor que podemos facer é non facer nada. O inmovilismo e a falla de ideas é o noso peor inimigo. 567 paradas/os en xaneiro de 2012 en Mugardos: unha cifra demasiado importante como para que non se tome ningunha iniciativa. Debemos coñecer a realidade polo miúdo é actuar. De aí a nosa moción.

"Praza Pública" Extra

Número Extra de "Praza Pública" sobre taxas, impostos e servizos públicos.

AS CONTAS CLARAS...

A través destes dous enlaces podedes acceder á nómina da nosa portavoz e ás subvencións do noso Grupo municipal. Aquí, aquí e aquí, outros documentos de interés.

DISTINTOS USOS, DISTINTO IBI

EU defende que se debe cambiar a ordenanza fiscal do IBI para que se pague de forma diferenciada segundo os usos (non é igual unha vivenda que unha gran industria). Propoñemos que se lle aplique o 1,1 de coeficiente no IBI a Forestal del Atlántico, modificando a ordenanza fiscal para aprobar tipos diferenciados atendendo ós usos establecidos. Así Forestal pasaría de pagar 143.119,98€ a 344.959,96€: 203.839,98€ ingresaría o Concello a maiores no ano 2013.

O informe da interventora municipal confirma a posibilidade e a legalidade da proposta plantexada por EU. Agora queda que o Pleno do Concello decida o que quere facer. As ordenanzas fiscais necesitan de maioría simple para seren aprobadas.

Forte subida do IBI decretada por Rajoy

O Goberno Central obriga a subir ata máis dun 30% en dous anos o I.B.I. (contribución).

O Real Decreto-Lei 20/2011, de 30 de decembro, de medidas urxentes en materia orzamentaria, tributaria e financieira para a corrección do déficit público establece: “aplicación transitoria e excepcional durante os exercicios 2012 e 2013 para os inmobles urbanos dun incremento do tipo impositivo do Imposto de Bens Inmobles …” Para as ponencias anteriores ó ano 2002, o incremento fíxase nun 10% (e un tipo mínimo do 0,5% en 2012 e do 0,6% no 2013”). Neste suposto atópase o Concello de Mugardos. Así que os inmobles urbanos, non así os de natureza rústica ou os de características especiais (Reganosa), sofrirán un incremento do 11% para o 2012 e de máis dun 30% con respecto ó ano 2011 para o 2013 no recibo da contribución. A aplicación do real decreto é obrigatoria para o Concello. Recordemos que os impostos están conxelados dende o ano 2007 por vontade dos grupos municipais a excepción de EU. Máis información e exemplos concretos neste enlace.

Solucións ao desfase na facturación da auga

Entre a urxencia e o corto prazo debemos limitar as causas que provocan un desfase importante entre a facturación realizada por Emafesa ó Concello e a facturada polo Concello ós/ás usuarias/os.

Con esa intención EU rexistrou hoxe unha proposta para o seu debate na Comisión de Obras, Servizos e Persoal que, entre outras medidas, contempla: controlar que o consumo de Forestal corresponda coa facturación, dotar de contadores ós centros públicos, control de edficios privados de uso público, control de edificios públicos doutras administracións (Autoridade Portuaria), control de equipamentos privados (cemiterios) e actualización do Padrón.

Cos resultados obtidos de executarse estas medidas, poderíamos abordar outras cuestións como: as lecturas de contadores, os diferentes usos da auga, o aproveitamento de Bordocedo, a estación do Esteiro, a depuración no Monte da Pandoira, a renovación de tubería de fibrocemento ou a reducción do consumo.

O pavillón tamén ten déficit ...

O servizo de pavillón municipal arrastra un déficit de aproximadamente 35.000 €, cantidade que supera os desequilibrios que se producen no servizo de lixo e sumidoiros, achegandose ó déficit do servizo de auga tras as modificacións aprobadas na Comisión de Facenda.

A suba do IPC nesta taxa (Ordenanza Fiscal nº15, reguladora da Taxa Pola Utilización do Polideportivo Municipal) foi aprobada por tódolos grupos políticos, a diferencia do que pasou coa taxa da auga, sumidoiros e lixo. Non obstante, EU plantexará na Comisión de Cultura e Deportes do día 11 de xaneiro que se inicie unha profunda revisión da mesma.

Esta revisión deberá contemplar, entre outras cuestións, unha aproximación entre o coste/hora (21€) e o prezo por utilización (6,95€ coa suba do IPC), así como un incremento das horas dispoñibles en inverno que facilite a utilización por un maior número de persoas.

Máis de 300.000 metros cúbicos...

Na comisión de servizos que se celebrará o día 11 de xaneiro de 2012, EU reclamará do goberno municipal unha explicación de por qué se pagan a Emafesa sobre 600.000 m³/ano, cando, segundo os nosos cálculos, o Concello factura ás/ós usuarias/os unhas 240.000 m³/ano. Como consecuencia, a recadación do Concello é por 240.000m³ e non por 600.000m3, como debería ser, segundo a facturación que pagamos a Emafesa.

En todo caso, EU reclamará, de non darse unha explicación convincente (que supoñemos que non hai, máis alá da falla de control polo goberno) que se inicien os traballos necesarios para correxir esta gran anomalía, que perxudica ó servizo e á cidadanía.

Unha vez correxida a anomalía, o servizo estaría equilibrado en canto a gastos e ingresos, sen necesidade de sofrir modificacións a alza para o consumo doméstico.

ACEPTADAS AS PROPOSTAS DE EU SOBRE AS TAXAS

As taxas de auga e sumidoiros sofren modificacións importantes a proposta de EU. As propostas foron apoiadas polo BNG e PSOE, supoñendo importantes avances: a redución do déficit no servizo de auga e sumidoiros sen gravar en exceso as/os veciñas/os, a desaparición da cota de mantemento e a non modificación dos baremos económicos para acceder ás exencións ou bonificacións nas taxas, tal e como se pretendía, perxudicando ó 40% das beneficiarias na actualidade (viúvas).

TAXA DE AUGA:

A proposta de EU de variar os tramos no consumo da auga máis a suba do 8,3% no último tramo (que afecta a Forestal e á Piscina) supón para as arcas municipais un aforro do 28%, establecendose o déficit do servizo de auga en 38.000 €. Isto supón un avance, aínda que non completa as expectativas de EU de reformar a taxa na súa totalidade para equilibrar ingresos e gastos. É necesario actualizar os padróns, establecer unha cota de mantemento (que, sen gravar máis, obrigue a pagar a auga á segunda vivenda), controlar con rigor a facturación que realiza Emafesa e desenvolver políticas de aforro no consumo, entre outras actuacións.

Fuximos das propostas que plantexan unha privatización do servizo baixo a premisa de que “canto peor o público, mellor”. A pregunta é: para quen mellor? Para os/as veciños/as? Ou para as empresas?

Tamén se aceptou a proposta de EU de suprimir a cota de mantemento nos usos comerciais e industriais ata a súa definición para todos os consumos.

TAXA DE SUMIDOIRO:

A proposta de EU de aplicar un 15% na suba supón de media un incremento de 30 céntimos de €/trimestre para un consumo doméstico. Na taxa de auga, lixo e sumidoiro aceptouse, tras non ser aprobada a proposta do BNG no Pleno ordinario, manter as exencións e bonificacións tal e como estaban contempladas.

TAXA LICENCIA DE ACTIVIDADE:

Retírase a proposta de suprimir as bonificacións por apertura de establecemento e creación de emprego, tal e como demandaba EU.

No resto das taxas aprobouse por unanimidade o incremento do IPC. NESTE ENLACE PODES VER TODA A INFORMACIÓN POLO MIÚDO.

QUÉN OU QUÉ FALLOU?

No Pleno de Decembro, o alcalde retirou o punto relativo á modificación de varias taxas municipais, atendendo á petición que lle fixera o P.P. antes de iniciarse o Pleno. EU tivo que intervir en rogos e preguntas para aclarar que o grupo de goberno descoñecía o sentido do seu voto e polo tanto non lle parecía ben que se dese por suposto nin o seu voto nin os seus argumentos, tal e como se deducía da intervención do propio Alcalde argumentado que non se apoiaba nin tan siquera a suba do IPC por parte dos grupos da oposición, recordando que os votos do BNG e EU no pleno sumaban maioría suficiente para que se puidesen aprobar e só a renuncia do BNG a falar con EU e o feito de buscar acordos só co P.P. obrigouno a retirar o punto do Pleno.

A proposta do BNG nas taxas do lixo, auga e sumidoiros non contiña só a suba do IPC, senón que contiña propostas que EU non aceptaba, por exemplo: modificar o baremo para as exencións por entender que non se pode aplicar o de emerxencia social. Esta modificación proposta polo BNG significaría que o 50% das unidades famliares de 1 membro (viúvas) pasarían de estar exentas a unha bonificación do 25% ( pasarían de pagar 0€ a 20€/trimestre aproximadamente).

EU proporía no Pleno un reaxuste no prezo da auga que servimos a Forestal do Atlántico (o gran consumidor para beneficio industrial) fronte á proposta do BNG, así como retirar a proposta de cota de mantemento para os comercios, dado que a súa aplicación suporía un incremento moi superior ó IPC única e exclusivamente para este sector. Se o BNG propuxese só a suba do IPC, contaría co voto favorable de EU, a pesar de que se nega a negociar con nós, buscando só a confrontación.

Na taxa por licencia de apertura de establecementos comerciais e industriais, EU a diferencia do BNG, non apoiaría a supresión das bonificacións para os/as que queiran abrir un “negocio”. Estas bonificacións incorporáronse en xaneiro de 2010 á taxa e non estamos dispostos e menos nestes momentos tan complicados a renunciar a un pequeno apoio ó fomento da actividade comercial.

No resto das taxas propostas (expedición de documentos, polideportivo, autotaxi, tenencia de animias, soportes de anuncios), votaríamos a favor do incremento do IPC.

A pregunta que nos facemos é: qué fallou ou quén fallou para que as tivese que retirar? Deberá cambiar o BNG a súa estratexía de goberno? Deberá o BNG deixar de mirar so á dereita?