SUBVENCIÓN PARA A MELLORA DA E.I. AS LAGOAS

O CEIP "Unión Mugardesa" contará este curso cun parque infantil

O Concello de Mugardos, a través dun acordo coa Delegación Provincial de Eduación, impulsa a concreción da demanda da Comunidade Educativa de dotar dun Parque Infantil ao C.E.I.P. “Unión Mugardesa”.

Para facer realidade este equipamento foi necesario en primeiro lugar que o Concello pusexe a disposición da Delegación Provincial de Educación os terreos; en segundo lugar, que a propia Delegación puxese as planchas de corcho no chan; e por último esta fase, na que o Concello dota de mobiliario ao espazo, convertindo así unha zona desaproveitada nun espazo que mellora as prestacións do colexio de educación pública en Mugardos.

Así, o día 11 de setembro e tras os últimos retoques o alumnado do C.E.I.P. “Unión Mugardesa” poderá disfrutar dun Parque Infantil.

Obras no "Santiago Apóstol" de Franza

O goberno municipal acondiciona o exterior do Colexio Santiago Apóstol,  revertindo a situación de anos  anteriores que impedía a utilización de practicamente o 90%  da superficie para actividades propias do centro. Estas obras, ó mesmo tempo, van a solucionar os problemas de humidade do centro, reparar o peche frontal e colocar un novo no lateral, evitar as zonas sombrías do edificio e reparar os elementos do parque infantil.

As obras continuarán coa eliminación de problemas detectados  no interior do edificio e que corresponden a conservación ( reparación de persianas, manillas das portas, azulexos dos baños, focos do alumeado, retirada de antena do tellado,etc.)

O Concello e o Centro Educativo quedan á espera de que a Delegación de Educación estude e execute os traballos necesarios, tal e como se comprometeu o Delegado hai uns días, na visita que realizou a Mugardos: a instalación do porteiro automático e o recubrimento das columnas do patio cuberto. 

Seguridade vial en Apelón

O Concello de Mugardos está a executar a construcción dunha beirarrúa de 2, 20 mts. de ancho ao longo da Escola Infantil do Apelón. Esta obra da cumprida resposta ó compromiso adquirido polo Concello coa Comunidade Educativa de dotar de seguridade vial á entrada e saída do alumnado. O remate da obra prevese que sexa antes do 11 de setembro, data do inicio do curso escolar.

A obra vai supor unha mellora considerable na seguridade vial do alumnado así como das/os usuarias/os do Centro de Saúde e do Mercado Municipal.

Ordeanza Fiscal nº 13: Escola Infantil "AS Lagoas"

Pódese consultar na páxina web do Concello a nova ordeanza fiscal da Escola Infantil "As Lagoas", que está en fase de exposición.

Axudas para educación e transporte

Onte saliu publicada no B.O.P a convocatoria de axudas para educación e transporte do Concello de Mugardos. O prazo de solicitudes será do 12 ao 23 de Xullo e do 10 ao 20 de Outubro. Neste enlace podes acceder ás bases da convocatoria na páxina web do Concello.

Aprobadas as propostas de AGE no Parlamento para as escolas de Mugardos

Unha boa nova: hoxe aprobouse por unanimidade no Parlamento de Galicia a iniciativa presentada polos nosos deputados (na foto, na recente visita que fixeron a Mugardos) sobre a ampliación do "Unión Mugardesa" e a rehabilitación da vivenda do bedel no "Santiago Apóstolo" de Franza. Neste enlace podes ler a nota que enviamos á prensa.

Mocións sobre o "Santiago Apóstolo" e o "Unión Mugardesa"

No Pleno do 26 de Abril foron aprobadas (con modificacións) dúas mocións de Esquerda Unida: unha sobre a ampliación do colexio "Unión Mugardesa"; a outra, referente á antiga vivenda do bedel do "Santiago Apóstolo" de Franza.

E como as visitas dos nosos deputados e deputadas de AGE non son en vano, aquí o enlace ás súas iniciativas parlamentares (Grazas!):
-Santiago Apóstolo
-Unión Mugardesa

Visita de deputados de AGE ás escolas de Mugardos

Parlamentarias/os de AGE solicitarán a ampliación do CEIP “Unión Mugardesa” e o compromiso da Consellería para destinar a usos educativos a antiga vivenda do bedel do CEIP “Santiago Apostol”.






A viceportavoz de AGE, Yolanda Díaz e os deputados Ramón Vázquez e Xabier Ron, percorreron xunto coa/cos concellerios/a de EU, Pilar Díaz e Genaro Prieto, os centros de Educación Infantil e Primaria do Concello de Mugardos. Como consecuencia da visita, presentarán unha proposición non de lei no Parlamento de Galicia para que se concrete no tempo a ampliación do CEIP “Unión Mugardesa” para facer efectiva a integración da Escola Infantil (Escola de Apelón) na Escola de Primaria.
Esta é unha reivindicación que dende o conxunto da Comunidade Educativa se leva realizando dende hai 5 anos, sen resultado ata o momento. Os argumentos para a ampliación son contundentes: inexistencia dun patio cuberto para xogar as/os nenas/os nos días de choiva, deficiente calefacción nos días de inverno, imposibilidade de disfrutar da biblioteca e as actividades que xiran en torno a ela, falta de aula de música, informática ou ximnasio, como si dispón o centro de primaria, dificultade de sustitución do profesorado pola distancia entre un centro e outro, etc Todo isto a maiores da racionalización dos recursos económicos e o importante aforro que suporía para o Concello e para a Consellería.
Tras visitar o CEIP “Unión Mugardesa” desprazáronse ata o CEIP “Santiago Apóstol”, onde analizaron a necesidade de que se concrete a cesión por parte do Concello da antiga vivenda do bedel á Consellería de Educación para destinala a usos educativos. O GM de EU presentará unha moción ó Pleno do Concello para que se atenda a demanda que dende hai máis dun ano presentou a dirección do Centro neste sentido, e o Grupo Parlamentar preguntará se a Consellería está disposta a asumir os costes da adecuación se a cesión patrimonial se formalizase.

Nova convocatoria de axudas ao estudo

O Concello de Mugardos fai unha nova convocatoria de axudas para estudantes. Podes acceder á convocatoria a través deste enlace.

Arreglos nas escolas.

Onte puidemos comprobar que, por fin, comezaron os amaños que reclamábamos nas nosas escolas, polo menos algúns deles. Con máis dun mes de retraso, o alcalde procedeu á contratación de dous operarios, que comezaron a traballar esta semana no CEIP "Unión Mugardesa".
Polo de agora, retirouse unha rúa sen uso, desmontouse parte da rexa metálica da pista polideportiva e reubicouse o contenedor de vidro. Ás nosas anteriores demandas sumamos hoxe a de que o Concello se poña en contacto con Telefónica para tratar de que adecente a cabina que hai á porta deste centro escolar. Seguiremos comprobando o curso destes arranxos, no "Unión Mugardesa" e no resto das escolas públicas de Mugardos.

Qué foi das contratacións para amañar as escolas?

A principios de Setembro, reclamamos ao goberno do BNG que levase a cabo as reparacións que demandaba o estado das nosas escolas públicas. No Pleno do día 19 aprobouse contratar a dúas persoas para realizar estes traballos. Vinteún días despóis de tomarse o acordo, o alcalde aínda non procedeu a realizar esas contratacións. 

Compromiso coa educación pública

Tras visitar os Centros de Ensino Público, reclamamos onte do goberno municipal, na Comisión de Obras, unha planificación dos traballos de reparacións. A demora débese a unha planificación deficitaria, pero tamén ao recorte executado pola Xunta de Galicia para contratacións.

Por tanto, o Concello debe facer contratacións de forma urxente para dignificar a nosa educación pública.

No documento adxunto faise referencia ás obras maiores que deben ter saída en positivo, rachando os impedimentos ou parálise do goberno municipal.

Comedor escolar e axudas á escolarización e xoguetes de Nadal

Na Comisión de Benestar celebrada onte, o goberno propuxo ampliar o prazo de inscripción. EU propuxo que se abrise un novo prazo para poder resolver xa, en función da ordenanza fiscal en vigor,  as solicitudes presentadas antes do 3 de Setembro. A nosa proposta foi aceptada.

Por tanto, hai un novo prazo para inscribirse ata o 14 de setembro, o que non impide que os ususarios poidan inscribirse máis adiante, ao longo do curso.

Ademáis, no día de hoxe rexistramos a petición de que as solicitudes do primeiro plazo se resolvesen  na comisión de Facenda do día 6 de setembro, para que as familias poidan saber cánto teñen que abonar antes de que empece o curso escolar.

Con respecto ás axudas para material escolar e xoguetes de Nadal, informamos de que se corrixiu un erro que observáramos na convocatoria, quedando tal como figuran nos seguintes enlaces:

-axudas para material escolar.

-axudas para xoguetes de Nadal.

Quedamos á espera da resolución destas convocatorias para saber se temos razón no resto das nosas críticas: véxanse as  entradas anteriores deste blog sobre material escolar e sobre xoguetes de Nadal.

Comedor escolar?... De qué me soa?...

Na Comisión de Benestar do pasado luns 20 de Agosto, a concelleira delegada de área dixo que non sabía se habería comedor escolar este curso, que non sabía se ía aplicar a taxa en vigor, que non sabía se prorrogaría o contrato á mesma empresa... Si sabía que o curso escolar empeza o 12 de Setembro, tal como se lle lembrara no Pleno de Xullo.  
Agora, aparece un aviso asinado polo alcalde na páxina web do Concello, no que se anuncia o servizo de comedor, pídese a mesma documentación requerida aos usuarios hai tres meses e establécese como data límite de inscripción o día 3 de Setembro.
¿Merecen isto os escolares mugardeses e as súas familias?

O BNG recorta as axudas á escolarización

Na Xunta de Goberno Local do 19 de Xullo, o BNG aprobou as axudas á escolarización 2012, asumindo a proposta do PP de aplicar os mesmos tramos económicos que en Emerxencia Social, proposta apoiada tamén polo PSOE. Isto supón que baixa o nivel de ingresos máximo para optar ás axudas e, dado que se fala de ingresos íntegros, o nivel é inferior incluso a Emerxencia Social. Aumentar a cuantía das axudas, facendo baixar o número de posibles beneficiarios, só pode tildarse de hipocresía. A convocatoria publicouse hoxe no BOP. Pero hai máis. O ano pasado logramos que se empregasen as casiñas 455 e 465 da declaración da Renda para determinar a capacidade económica dos solicitantes. Trala resposta da presidenta da Comisión de Benestar no último Pleno e vista a convocatoria, tememos que se vai empregar a casiña 09 (ingresos computables). Un exemplo concreto: unha persoa que se achega aos 1000 € brutos ao mes, ten 9620 de ingresos imputables, pero suma 3912,36 € nas casiñas 455 (base impoñible xeral) e 465 (base impoñible do aforro). Por certo, estas son as casiñas que empregan o MEC e a Xunta nas súas becas.
Outro problema grave é o plazo de presentación das solicitudes, do 3 ao 5 de Outubro! Aparte da barbaridade das datas, as solicitudes teñen que ser evaluadas polos técnicos e pasar á Comisión de Benestar: sucederá como o ano pasado e as axudas concederanse cando xa as familias teñan afrontado por si soas o gasto, que este ano se incrementará notablemente pola suba do IVE.
Entre outras propostas que fixemos para mellorar as axudas, están a supresión do punto 3.4 da convocatoria 2011 (que impedía optar ás axudas aos autónomos) ou a posibilidade de que se adiante o importe da axuda cando un informe técnico o avale.

O ensino público debe ser garante de igualdade

A situación de precaridade económica das familias estase deixando ver a través dos/as seus/suas fillos/as nos Centros de Ensino Públicos de Mugardos. Así, algúns alumnos/as non poden contar con todo o material necesario para desenvolver as súas tarefas na escola.

Propuxemos no Pleno de Abril que o goberno municipal actúe con urxencia neste curso e poña os instrumentos necesarios para evitar estas situacións no vindeiro, asinando un convenio cos Centros de Ensino Público e axilizando a convocatoria das Axudas á Escolarización.  

Acto Público: Recortes no Ensino

O xoves 26 de Abril, ás 8:00 da tarde, celebraremos un acto público no Centro Cívico sobre os recortes no Ensino que está levando a cabo o goberno. Intervirán os responsables comarcais de Ensino de CC.OO., Emilia Veiga e Tomás Miranda.

COMEDOR ESCOLAR

A aprobación da taxa do comedor convírtese nunha excusa perfecta para subir un 35% o prezo do menú para unha boa parte dos/as usuarios/as, pasando de 3,8 € menú/día no curso 2010-11 a 5,15 € menú/día a partires de agora. A eliminación dunha porcentaxe de bonificación que ata o de agora recibían tódolos usuarios pode pór en risco de desaparición ou de insostibilidade económica un servizo de conciliación da vida familiar e laboral, así como de garantía dun xantar para os nenas/os con familias en dificultades económicas.

Ata o de agora, non existía ningunha taxa ou norma que prohibise ó grupo de goberno financiar ós/ás fillos/as de familias en emerxencia social a totalidade do custo do comedor escolar. Agora familias que poden acceder a axudas de alimentación co Regulamento de Emerxencia en vigor terán que cofinanciar o coste do comedor dos seus fillos.

Estas dúas cuestións, sumadas a outras diferencias, fixo que EU presentase unha reclamación á taxa aprobada polos grupos municipais de BNG/PP/PsdeG-PSOE, reclamación que non foi aceptada polo resto dos grupos. [Máis información, AQUÍ]

AXUDAS Á ESCOLARIZACIÓN: NOVA VICTORIA

Na anterior Comisión de Benestar Social logramos que as axudas a Comedor Escolar saísen do capítulo de Emerxencia Social. Na Comisión extraordinaria de hoxe, 26 de Setembro, logramos que se convoquen Axudas para material e transporte escolar, diferenciadas das axudas de Emerxencia Social. A proposta de EU foi aprobada por tódolos grupos da Comisión, incorporándolle as axudas para ensino universitario, que propuxeron PSOE e PP. Non as contemplamos, en principio, porque xa parecía difícil que se aceptase a proposta que levábamos. Pero conseguímolo.